Vorið 1902 fékk Eggert Laxdal, kaupmaður á Akureyri, útmælda lóð austan Hafnarstrætis. Á lóðinni byggði hann verslunar og íbúðarhús þar sem nú er Bautinn. Austan við Bautahúsið byggði hann vörugeymslu þar nú er Smiðjan. Verslunin Edinborg í Reykjavík rak á árunum fram að fyrri heimsstyrjöld umfangsmikla verslun þar sem nú er Bautinn en vörulagerinn var þar sem Smiðjan er nú. Verslunarstjóri var Guðmundur Jóhannesson, bróðir dr. Alexanders Jóhannessonar fyrrverandi háskólarektors og frumkvöðuls í flugmálum. Á þessum tíma bjó Guðmundur með fjölskyldu sinni í íbúð í suðurenda yfir versluninni. 1914 kaupir Guðmansverslun sjálft verslunarhúsið og rekur þar áfram verslun. Verslunarstjóri var Vilhelmína Sigurðardóttir. Hún giftist Jónasi Þór verksmiðjustjóra og bjuggu þau í húsinu eins og forverar þeirra. Jónas Þór var mikill áhugamaður um garðrækt. Hann kom upp fallegum garði fyrir sunnan húsið og var sennilega sá eini sem hélt býflugnabú á Íslandi á þessum tíma. Veitingastaðurinn Bautinn tók síðan við verslunarhúsnæðinu og var Bautinn formlega opnaður 6.apríl 1971, lítill staður í fyrstu en hefur á síðustu árum verið mikið stækkaður. Vörugeymslan var seld Jóni S. Espholin vélsmiði og rak hann þar maskinværksted frá 1918-1930. Árið 1931 var reist tengibygging milli Bautans og Smiðjunar þar sem um árabil var rekin Nýja-Kjötbúðin, en þar er núna aðal eldhús fyrir báða veitngastaðina. Eftir að Jón S. Espholin hætti rekstri tók Valmundur Guðmundsson við rekstrinum og rak vélsmiðju sína til 1965. Eftir að rekstri vélsmiðju lauk var heildverslun T.Stgr.&Co. þar til húsa uns húsnæðinu var breytt og Smiðjan tók til starfa í júní 1977.